अमेरिकी निर्वाचनको मतगणना जारी, मुख्य राज्यहरुमा के भइरहेको छ ?

 

वाशिङ्टन । नोभेम्बर ३ मा भएको अमेरिकी निर्वाचनो मतगणना जारी रहेको छ । अहिले केही मुख्य राज्यहरुको मतगणना चलिरहेको छ । विश्वको ध्यान अमेरिकी मतदाताहरुले आगामी चार वर्षका लागि आफ्नो राष्ट्र प्रमुखमा कसलाई मत दिएका छन् भन्‍नेतर्फ केन्द्रित भएको छ । 

हालसम्मको नतिजा अनुसार डेमोक्रेटिक उमेदवार जो बाइडेनले २४३ इलेक्टोरल कलेज मत प्राप्त गरेका छन् भने सत्ताधारी रिपब्लिकन उमेदवार डोनाल्ड ट्रम्पले २१४ इलेकटोरल कले मत प्राप्त गरेका छन् । 

व्हाइट हाउसका लागि निर्वाचित हुन २७० इलेक्टोरल कलेज मत आवश्यक हुन्छ । हालसम्म ५० वटा राज्यमध्ये ४४ राज्यको मतगणना सकिसकेको छ । 

अब एरिजोना, जर्जिया, नेवाडा, पेन्सलभानिया, नर्थ क्यरोलिना र विस्कनसिनको मतगणनाको नतिजा आउन बाँकी रहेको छ । यी राज्यहरु नै राष्ट्रपति को हुने भन्‍ने निर्णायक बन्‍ने बीबीसीले जनाएको छ । 

बीबीसीका अनुसार बाइडेनको जितका लागि विस्कनसिन, एरिजोना र नेवाडामा जित निश्‍चित गर्न आवश्यक छ । अहिले मतगणना जारी रहेको छ । 

न्युयोर्क टाइम्सका अनुसार जर्जियामा ट्रम्प २४ हजार मतले अघि रहेका छन् । त्यसैगरी नेवाडामा बाइडेनको आठ हजार मतको अग्रता रहेको छ । 

पेन्सलभानिया ९० प्रतिशत मतगणना सकिँदा ट्रम्पले एक लाख ६४ हजार मतले अग्रता कायम गरेका छन् भने एरिजोनामा बाइडेन ८० हजार मतले अघि रहेका छन् । 

नर्थ क्यारोलिनामा ट्रम्पको ७७ हजार मत बढी रहेको छ । विसकन्सिनमा बाइडेनले २० हजार मतको अग्रता लिएका छन् । 


SHARE THIS